ازاي بدأت اسافر

 إزاي بدأت أسافر ✈️

بيصعب عليا شباب بتضيع عمرها علي القهاوي والسوشيال ميديا العمر بيفوت وهو مصمم أنه يكون نقيب القهوة النهاردة هحكيلكم قصتي اللي فيها ردود علي كل الاسئلة اللي بتوصلنا علي الصفحة.

أنا من مواليد الساحل الشمالي بالإسكندرية سنة 1985 من أسرة مصرية بسيطة وكنت الطفل الأخير لوالدي ويوم ما كملت أسبوع أنفصلت والدتي عن والدي أجتماعيا يعني كان وشي فقر 😀

بعد كام سنة سافرت مع والدتي الي مدينة الإسماعيلية وكملت دراسة هناك في مدرسة حكومية وأول يوم أشتغلت فيه برة البيت كان عندي 9 سنين وكان ثمن شغل اليوم جنية ونصف وكنت فرحان جدًا بالشغل بس صاحب الشغل قالي أنت سنك صغير ومش هينفع تشتغل تاني مش بقولكم وشي فقر أنا عشت طفولتي كلها شغل عمر ما حد جابلي لعبه أو كان ليا أصحاب في سني كل صحابي ناس كبيره كنت بشتغل معاهم 😭

دخلت الاعدادي وكنت بشتغل مع الدراسة أشتغلت عند حلاق وأشتغلت في المعمار وفي الفصوليا التصديرية كعامل وكان اليوم ب4 جنية وبعد فتره دخلت الثانوي وفي الصيف روحت أشتغل في شرم الشيخ وكانت المقابله أني منفعشي للشغل لاني معنديش لغة إنجليزية المشكلة أني مش معايا ثمن مواصلات للإسماعيلية أشتغلت في مطعم 4 أيام لحد ما جمعت ثمن تذكره العودة ورجعت في الباص وشريط حياتي كله قدامي وصلت البيت مع شنطة همومي وعمري ما نسيت كلمة أمي لما رجعت قالتلي انت راجل والراجل لازم يجازف ويحاول 🤲

قعدت في البيت أسبوع محبط وفي يوم قالوا أن في شغل في العريش بيحتاجه عمال تجمع ثمرة الخوخ والبطيخ روحت هناك في مكان أسمه الماسورة وأشتغلت اليوم ب5 جنية وبدأت أجمع بدات الدراسة وانا مش عايز ارجع لحد ما جمعت 280ج وكان أكبر مبلغ امسكه في حياتي لشغل لمدة 70 يوم متواصل 💪 روحت أديت والدتي المبلغ وقولتلها أبنك راجل رزعتني بوسة مش ناسيها لحد دلوقتي الام ياجماعة 😘 

بعد ما رجعت المدرسة لقيتهم فصلوني علشان الغياب روحت للمدير الله يكرمه كان أسمه الاستاذ عبدالله الفاضل تفهم ظروفي ورجعني تاني وكملت وعديت بمجموع ضعيف وخلص الثانوي مجموعي مجابشي جامعة حكومية وانا مش معايا فلوس للخاص بدأت اشتغل تاني اشتغلت في العربيات النقل أسطي سواق كان السواق بيشرب مخدر..ات ويصحيني بالليل اعمله شاي 🍵 علشان يحبس مزاجه 😂😂 وبالنهار أغسله هدومه وكان مرتبي في الشهر 500ج كانت شغالنه صعبه ومهينه للغايه لدرجة مره نمت وأنا واقف فوق خزان مياه نار خام تركيز 98.50% وهو بيتملي وأتملي ونزل علي الكوتشي والشوز أتفرتك بس ربنا كريم❤️

لميت مبلغ 5000ج من شغل النقل وفتحت محل مع واحد شراكة وبعد 3 سنين فتحت شركة تسويق صغيرة راس مالها 25 الف جنية واشتريت عربية بمقدم 9000ج وطلعت رخصة وبقيت اشتغل حوالي 16 ساعة من المحل للشركة والشركة كان فيها موظف واحد اللي هو أنا بعد فتره البرج اللي فيه الشركة مال علي جنبه والشركة قفلت وخسرت كل شيء بس الحمد لله فضل المحل 🙏

بعد فترة سافرت دبي سياحة وبدأت أسال علي بيزنس هناك تعرفت علي شخص من شرق اسيا اغراني في تجارة الإلكترونيات وجالي مصر ونصب عليا في مبلغ محترم ورجعت لنقطة الصفر من جديد بس كمان عليا ديون بيعت العربية اللي سديت قسطها بالكامل وقعدت في البيت 6 شهور بقيت بروح المحل خفيف سافرت إيطاليا مجانا ورجعت أفكر من جديد 😭

أقترضت مبلغ وفتحت محل تاني بدون شراكة وأشتغلت في شركة فودافون سنه 2009 كموزع معتمد بالعقد لمنطقة الإسماعيلية وسافرت شرق اسيا واوروبا وتغير الحال تدريجيا وفي عام 2013 فتحت شركة خاصة براس مال 50 الف جنية Shagie Phone متخصصة في بيع أرقام مميزة لكل شركات الإتصالات ومنها بيع أون لاين ساعتها الناس كانوا بيضحكوا عليا ويقوليلي يعني ايه أرقام مميزه بفضل الله وكرمة الشركة دي دلوقتي رأس مالها بالملايين ❤️

وسنة 2017 عرض عليا موقع سفر أن أكون مستشار للسفر لمده سنتين وأنا مستشار لحد دلوقتي علشان بحب السياحة والسفر ومنها فتح ليا شغل تاني إني اهندل للناس ورقها علشان تأخد تاشيرة لدول صعبة بقيت أشتغل أون لاين مع كذا حاله يوم الاجازة والشغل التاني في الأيام العادية سنة 2019 جاتلي فكره مجنونة شوية إني اعمل حاجه أسمها سياحة المانجا وهي عباره عن أننا نسمح للوافدين أنهم يدخلوا مزارع المانجا يقطفوا منها مانجا ويقضي سياحة بيئية من هذا النوع ساعتها سألت ناس حواليا ناس قعدت تضحك وناس تقولي أنت مجنون لكن فعليا فتحت في 2021 ومن هنا بدأت فكرة العلامة التجارية الجديدة مزارع شجيع - Shagie Farms عملت الفكرة بعد دراسة وطبقتها وهي عباره عن منتجع بيئي في مدينة الإسماعيلية يقدم كل أنواع المأكولات الريفية المصرية القديمة ومنا هنا لقيت الحمد لله إقبال قوي جدأ والفكره عجبت الناس لحد ما في 2022 أتعرض عليا في أسم مزارع شجيع رقم مالي ضخم لكن تشبثت بالفكره وقلت لازم أكمل لاني بحب السياحة وهو جزء من السفر في أول سنه زار المنتجع أجانب من 12 دولة وبفضل الله سبحانه وتعالى السنه الماضيه كانوا أضعاف الأرقام. 

بعد حرب طويلة من الفشل والخسائر وبعد ما كنت شغال يوميه ب5 جنية وبستحمه في الترعة الحمد لله بقيت أحجز ڤيلا بيتش في المالديف وغرفه مطله في كروز البحر الكاريبي 🚢 اللي عايز أوصله للشباب مفيش حاجه أسمها مستحيل أوعي تستسلم ربنا أكبر من أي حد أنا أغلب أصحابي هيتفاجئوا لما يقروا ده لاني عمري ما حكيت حزني لحد طول عمري بحكي لربنا وربنا دائما بيجبر بخاطري ❤️

صدقوني الرزق متقسم بين المال والصحة والبنون والأهل ممكن يكون عندك حجتين وحد تاني حاجتين تاني لكن عمر ما حد بياخد كل شيء الأهم اننا نحمد ربنا ونسعى 🙏

منقول من صفحه احمد شجيع