راجع من مصر للندن.. فوجئت بطابور فى الجوازات لم أراه من قبل،

 راجع من مصر للندن.. فوجئت بطابور فى الجوازات لم أراه من قبل، انتهى الامر انى قعدت فى

طابور الجوازات ٥ ساعات.. نفس عدد ساعات السفر من القاهره للندن.

الطابور كان معظمه شباب،  كنت فاكرهم طلبه من مصر جايين يدرسوا فى لندن.

بعد فتره بدأت الناس اللى فى الطابور تتكلم و تتعرف على بعض.

فوجئت أن الأغلبية العظمى اللى على الطياره دكاتره من الدفعات الحديثه جايين يشتغلون بانجلترا.

بعضهم جاى يستلم شغل لاول مره و بعضهم بقى له سنه او ٢ شغال فى انجلترا

الدفعات ٢٠١٦ و ٢٠١٧ و ٢٠١٨ من مختلف الجامعات بس الأغلبية من جامعة القاهره، ولاد و بنات، فى منهم كان ليه نيابات سابها و فى كان ليه تكليف، و بيقولولى احنا كل دفعتنا بره مصر.

كل واحد فيهم حاطت لنفسه خطه و ناوى على training number ثم وظيفه استشارى فى سته إلى عشر سنوات على حسب التخصص..

و بعدين بعد خمس ساعات وصلت لضابط الجوازات، لقيته بيضحك و بيقولى: انت كمان دكتور؟ طياره مصر بتبقى كلها دكاتره، امال مين اللى بيعالج العيانين  فى مصر؟!!

كنت سعيد أن الدكاتره من الدفعات الحديثه ليها هدف واضح و طريق واضح قدامهم، بس متضايق أن مصر خسرت كل الدكاترة دول، اللى هما من خيره شباب مصر، و انجلترا رحبت بيهم و اخدتهم على الجاهز.

الدكاترة دول ماشتغلوش فى مصر خالص، سافروا بعد التخرج، و مش ناويين يرجعوا،  و مش حاطين مصر على قائمة الاختيارات،  عمرهم ما هيرجعوا مصر. على عكس اللى بيسافر من جيلنا، بيشتغل فتره فى مصر و بعدين يسافر ياخد خبره و البعض يرجع و البعض مايرجعش..

لو البلد مش محتاجه دكاتره و الموجود كفاية، يبقى خلاص، كده منفعه للطرفين.. بس لو عايزه دكاتره خاصة مع كل المدن الجديده اللى بتتبنى دى  و الانفجار السكانى، يبقى لازم حل سريع.

منقول من صفحه أطباء مصر